Lees: Psalm 31:1-6; Lukas 23:44-49 Teks: Psalm 31:6; Lukas 23:46a Liturg: Ds Louis Aucamp Tema: “Vader, in U hande gee ek my gees oor” Sing: Ps. 147:1,4; Ps. 31:2; Ps. 31:1,3,4,5; Ps. 136:1,2,3,20 Sewe keer praat Jesus aan die kruis. Die sewende kruiswoord is: “Vader, in U hande gee ek my gees oor”. Wanneer Jesus aan die kruis praat, is Hy besig om te preek, Hy het ‘n boodskap, Hy wil steeds van die kruis af verkondig dat Hy die Christus is, dat Hy die Gesalfde van God is om versoeningswerk te kom doen. Wanneer Jesus van die kruis af preek, dan preek Hy nie teksloos nie, Hy preek vanuit die Skrif, vanuit die Ou Testament kom Sy prediking. Sy sewende kruiswoord kom vanuit Psalm 31. Dit beteken ons moet mooi gaan kyk waaroor gaan Psalm 31. Waarom sou Jesus juis vanuit Psalm 31 sy laaste kruiswoord aanhaal? Die antwoord is ontsagwekkend mooi en ryk en vol troos en met baie toekomsperspektief!

Lees: Romeine 8:18-39 Teks: Romeine 8:18 Liturg: Ds Louis Aucamp Tema: Plaas jou lyding op ‘n weegskaal Sing: Ps. 118:12; Ps. 34:6; Ps. 88:1,2; Ps. 146:2,3; Ps. 146:1,8 Baie predikante sal vir u sê dat Romeine 8 ‘n uitsonderlike Skrifgedeelte is om gelowiges in Christus te help met swaarkry en lyding. Die gemeente in Rome het buitengewone swaarkry en lyding beleef. Hulle was onder die voete van die Keiser, ‘n man wat die Christene geminag het, selfs gehaat het. Die Keiser van Rome het homself god verklaar en byna, soos Nebukadneser, van almal verwag om hom te aanbid. Die Christene, egter, het gesê dat hulle Koning is Jesus Christus, hulle aanbid slegs Eén, Jesus, die Seun van God, die Verlosser. Die twee lysies van swaarkry wat in Romeine 8:35 en Romeine 8:38-39 gegee word, is presies die dinge wat die Keiser in sy wrewel teenoor die Christene gedoen het. Die apostel Paulus, onder die inspirasie van die Heilige Gees, gee wonderlike berading aan die Christene oor hulle swaarkry en lyding. Die apostel se berading destyds is steeds berading vir gelowiges wat vandag in swaarkry en lyding is!

Lees: Psalm 131 Teks: Psalm 131 Liturg: Ds Louis Aucamp Tema: Gee dit wat vir jou te groot is vir die HERE Sing: Ps. 146:1; Ps. 146:8; Ps. 146:2,3; Ps. 147:4 Psalm 131 skitter in sy eenvoud, sprankel in sy diepte. Psalm 131 is wonderlik troosryk vir gelowiges, veral gelowiges in nood. Psalm 131 se eenvoud wys in sy pragtige struktuur, slegs 3 verse. Vers 1 bevat twee stellinge, vers 2 verduidelik die stellinge in beeldspraak en vers 3 is ‘n gevolgtrekking. Die diepte van Psalm 131 kom na vore wanneer ons sien dat Koning Dawid in diepe nood is, daar is iets in sy lewe wat selfs vir hom as koning te groot is om te hanteer. En dan roep hy die hele kerk op om dit wat vir jou te groot is aan die Here te gee!

Loof die HERE, of my siel!

00:11:43 Voorafsang 00:14:25 Votum en seëngroet 00:16:30 Geloofsbelydenis 00:17:50 Afkondiging van die Wet 00:22:29 Gebed 00:25:59 Skriflesing 00:36:41 PREEK en WOORDVERKONDIGING 01:14:04 Gebed 01:20:06 Seën uitspreek Sing: Ps. 92:1,2; Ps. 92:3,4; Ps. 81:12; Ps. 92:6,7; Ps. 149:1,2 Lees: Efesiërs 1:3-14; Efesiërs 4:25-32; Efesiërs 5:18-21 Teks: Efesiërs 1:13; Efesiërs 4:30; Efesiërs 5:18 Liturg: Ds Louis Aucamp Tema: Verseël met die Heilige Gees; Bedroef die Heilige Gees nie; Vervul met die Heilige Gees Sing: Ps. 92:1,2; Ps. 92:3,4; Ps. 81:12; Ps. 92:6,7; Ps. 149:1,2 1. Verseël met die Heilige Gees. Die apostel Paulus, onder die inspirasie van die Heilige Gees, beëindig ‘n uitsonderlike lang sin op ‘n hoogtepunt. Efesiërs 1:3-14 is in die oorspronklike taal een enkele sin. Dié lang sin gaan oor God Drie-enig, met beklemtoning op die Vader in Efesiërs 1:3-6, beklemtoning op die Seun in Efesiërs 1:7-12 en met beklemtoning op die Heilige Gees in Efesiërs 1:13 en 14. Daar loop ‘n refrein in hierdie lang sin wat na vore kom in vers 6, vers 12 en vers 14 naamlik “tot lof van sy heerlikheid”. Dit is duidelik dat Paulus die heiliges en gelowiges (1:1) oproep om die Persoon en werk van die Vader, die Seun en die Heilige Gees te loof en te eer. Ons fokus is in die eerste hoofpunt van die preek op vers 13, die verseëling met die Heilige Gees en die wonderlike troos vir gelowiges om met die Heilige Gees verseël te wees. 2. Bedroef die Heilige Gees nie. Daar loop ‘n baie mooi lyn deur die Efesiërsbrief oor die Persoon en die werk van die Heilige Gees. In Efesiërs 1:13 beskryf die apostel die feit dat ons met die Heilige Gees verseël is, egter, in Efesiërs 4:30 gebruik die apostel die feit van ons verseëling met die Heilige Gees om ons op te roep om die Heilige Gees nie te bedroef nie. Wat sou dit beteken om die Heilige Gees nie te bedroef nie? 3. Vervul met die Heilige Gees. Die apostel gebruik in Efesiërs 5:18 pragtige beeldspraak, tegelyk is daar ook ‘n kontras, waarin hy die verseëldes met die Heilige Gees oproep om al voller van die Heilige Gees te word. Wel, wat sou ons kon doen om al voller van die Heilige Gees te word?

00:00:00 Begin 00:02:55 Seëngroet 00:12:41 Skriflesing - 2 Pet 1v3-10 - Sekerheid van ons geloof 00:23:00 Prediking - Geloofsekerheid - Heilsorde [iiic]. Wat om te doen as jy nie geloofsekerheid het nie 00:59:20 Gebed 01:04:04 Slot Psalm & Wegstuurseën

Sing: Ps. 122:1,2; Ps. 79:5,6,9; Ps. 27:2; Ps. 84:1; Ps. 84:2 Lees: 1 Korintiërs 3:1-23 Teks: 1 Korintiërs 3:16-17 Liturg: Ds Pieter le Roux Tema: 1 Korintiërs (iv): Julle is die tempel van God Die verdeeldheid in die gemeente van Korinte was die gevolg van ’n vleeslike gesindheid by baie van die lidmate in die gemeente. Jaloesie, twis en tweedrag volg noodwendig wanneer gemeentelede vleeslik (en nie geestelik) is nie. Hulle moet onthou dat hulle die tempel van God is. Daarom is verdeeldheid in die gemeente, ’n skending van die tempel van God. As iemand die tempel van God skend, sal God hom skend.

AANDDIENS (18:00) Lees: 1 Johannes 2:3-6 Teks: 1 Joh. 5:12-13 Belydenis: Dordtse Leerreëls Hfst. 1 par. 12 Liturg: Ds Pieter le Roux Tema: Die Heilsorde (iiib) Kan jy seker wees jy glo? Sing: Ps. 73:1, 10; Ps. 16:2 Ps. 116:9 SB 10: 3, 4, 5, 6 God het deur Jesus Christus vir ons heil (redding) bewerk. Die weg waarlangs ons deel aan hierdie heil kry, kan die heilsweg of heilsorde genoem word. Daar is ’n orde in die wyse waarop God sy redding aan ’n ware gelowige skenk. Dit is by uitstek die werk van die Heilige Gees. Daar is verskeie seëninge wat God aan ons skenk in die redding: i) Roeping ii) Wedergeboorte iii) Geloof (en bekering) iv) Regverdigmaking v) Heiligmaking (en volharding) vi) Verheerliking Ons het reeds op 17 Augustus ‘n preek gehad oor die geloof. Vanaand wil ons nog ’n keer stilstaan by die geloof, en spesifiek aandag gee aan geloofsekerheid.